പൈതൽ മല പോലെ തന്നെ കണ്ണൂർ ജില്ലയിലെ അതി മനോഹരമായ മറ്റൊരു ട്രെക്കിങ് കേന്ദ്രമാണ് പാലക്കയം തട്ട്. മലയോര ഗ്രാമമായ നടുവിൽ എന്ന സ്ഥലത്താണ് പാലക്കയം തട്ട് സ്ഥിതി ചെയ്യുന്നത്. സമുദ്രനിരപ്പിൽ നിന്ന് ഏകദേശം 3500 അടി (1000 മീറ്റർ) ഉയരത്തിൽ സ്ഥിതി ചെയ്യുന്ന ഈ സ്ഥലം, മനോഹരമായ കാഴ്ചകൾക്കും തണുത്ത കാലാവസ്ഥയ്ക്കും പേരുകേട്ടതാണ്.
മലനിരകളുടെയും താഴ്വരകളുടെയും വിശാലമായ കാഴ്ചകൾ പാലക്കയം തട്ടിനെ സഞ്ചാരികൾക്ക് ഏറെ പ്രിയമുള്ളതാക്കുന്നു. കോടമഞ്ഞ് നിറഞ്ഞ പ്രഭാതങ്ങളും സൂര്യാസ്തമയത്തിന്റെ മനോഹരമായ കാഴ്ചകളും ഇവിടുത്തെ പ്രത്യേകതകളാണ്. പുൽമേടുകളും പാറക്കെട്ടുകളും നിറഞ്ഞ ഭൂപ്രകൃതി ഫോട്ടോ ഷൂട്ടുകൾക്കും വളരെ അനുയോജ്യമാണ്.
സാഹസിക വിനോദങ്ങൾക്ക് താൽപ്പര്യമുള്ളവർക്ക് ഇവിടെ ട്രെക്കിംഗ് നടത്താനുള്ള സൗകര്യം ഉണ്ട് . മലയുടെ മുകളിലേക്ക് കാൽനടയായി കയറുന്നത് ഒരു മികച്ച അനുഭവമാണ്. ടൂറിസം വകുപ്പിന് കീഴിൽ ഉള്ള മലയുടെ മുകളിലുള്ള ഇക്കോ-ടൂറിസം കേന്ദ്രം സഞ്ചാരികൾക്ക് ആവശ്യമായ സൗകര്യങ്ങൾ ഒരുക്കുന്നു.
മലയോരത്തിലെ വളഞ്ഞു പുളഞ്ഞ റോഡുകളിലൂടെ പ്രകൃതി ഭംഗി ആസ്വദിച്ചുള്ള പാലക്കയം തട്ടിലേക്കുള്ള യാത്രയും മനോഹരമാണ്. മഴക്കാലത്ത് ഇവിടുത്തെ കാഴ്ചകൾക്ക് കൂടുതൽ ഭംഗി വരും, എന്നാൽ യാത്ര അൽപ്പം ദുഷ്കരമായേക്കാം. അതിനാൽ നവംബർ മുതൽ മെയ് വരെയുള്ള മാസങ്ങളാണ് സന്ദർശനത്തിന് ഏറ്റവും അനുയോജ്യം.
