ബേക്കൽ കോട്ട കാസർഗോഡ്

കാസറഗോഡ് ജില്ലയിലെ ബേക്കൽ എന്ന സ്ഥലത്താണ് ബേക്കൽ കോട്ട സ്ഥിതി ചെയ്യുന്നത്. കേരളത്തിലെ തന്നെ ഏറ്റവും വലുതും മനോഹരവുമായ കോട്ടയാണ് ബേക്കൽ കോട്ട. അറബിക്കടലിന്റെ തീരത്തായി സ്ഥിതി ചെയ്യുന്ന ഈ കോട്ട 17 -ാം നൂറ്റാണ്ടിൽ കെളദി നായ്ക്കന്മാരാണ് നിർമ്മിച്ചത്. സൈനിക ആവശ്യങ്ങൾക്ക് വേണ്ടി നിർമിച്ച ഈ കോട്ട 40 ഏക്കറിലധികം വിസ്തൃതിയിൽ പരന്നു കിടക്കുന്നു. 

നൂറ്റാണ്ടുകളോളം നിരവധി ഭരണാധികാരികളുടെ കൈകളിലൂടെ കടന്നുപോയ ചരിത്രമാണ് ബേക്കൽ കോട്ടയ്ക്കുള്ളത്. കെളദി നായ്ക്കന്മാരിൽ നിന്ന് ഹൈദർ അലി കോട്ട പിടിച്ചെടുക്കുകയും പിന്നീട് ടിപ്പു സുൽത്താന്റെ സൈനിക കേന്ദ്രമായി മാറുകയും ചെയ്തു. 1799-ൽ ടിപ്പു സുൽത്താന്റെ മരണശേഷം കോട്ട ബ്രിട്ടീഷ് ഈസ്റ്റ് ഇന്ത്യ കമ്പനിയുടെ കൈവശമായി. ഇന്ന്, ഈ കോട്ട പുരാവസ്തു വകുപ്പിന്റെ സംരക്ഷണയിലാണ്. കോട്ടയ്ക്ക് ചുറ്റുമുള്ള മനോഹരമായ പുൽത്തകിടികളും വഴികളും സന്ദർശകർക്ക് കൂടുതൽ ആകർഷകമാണ്. മനോഹരമായ പ്രകൃതിദൃശ്യങ്ങളുള്ളതിനാൽ ഇവിടെ പല സിനിമകളും ചിത്രീകരിച്ചിട്ടുണ്ട്. വളഞ്ഞും പുളഞ്ഞുമുള്ള കോട്ടയുടെ പ്രവേശന കവാടങ്ങളും, നിരീക്ഷണ ഗോപുരവും, പ്രതിരോധത്തിനായി നിർമ്മിച്ച രഹസ്യ തുരങ്കങ്ങളും കോട്ടയുടെ പ്രത്യേകതയാണ്. ഇവിടത്തെ നിരീക്ഷണ ഗോപുരത്തിൽ നിന്ന് കടലിന്റെയും ചുറ്റുമുള്ള പ്രദേശങ്ങളുടെയും മനോഹരമായ കാഴ്ചകൾ കാണാൻ സാധിക്കും.

കടലിനോട് തൊട്ടുരുമ്മി നിക്കുന്ന അതിമനോഹരമായ ബേക്കൽ കോട്ട ഇന്ന് ഒരു പ്രധാന ടൂറിസ്റ്റു ലൊക്കേഷൻ ആണ്. കോട്ടയുടെ പശ്ചാത്തലത്തിൽ നിന്നുള്ള കടലിന്റെ കാഴ്ച അതി മനോഹരം ആണ്. ഇന്ന് കോട്ടയുടെ സമീപത്തു തന്നെ ആയി പള്ളിക്കര എന്ന സ്ഥലത്തു ടുറിസം വകുപ്പിന്റെ കീഴിൽ ആയി മനോഹരമായ ഒരു ബീച്ച് പാർക്കും സജ്ജീകരിച്ചിട്ടുണ്ട്. കൂടാതെ സഞ്ചാരികൾക്ക് താമസ സൗകര്യം ഒരുക്കാൻ  നിരവധി സ്വകാര്യ റിസോർട്ടുകളും ഇന്ന് ബേക്കലിന്റെ സമീപത്തായി ഉണ്ട്. കേരളത്തിലെ തന്നെ പ്രധാന പെട്ട ഒരു ഡെസ്റ്റിനേഷൻ വെഡിങ് കേന്ദ്രം ആണ് ഇന്ന് ബേക്കൽ.